Sunday, 08 November 2009
-
疑似倒曾 禁過馬路
唉…香港警察，搞成咁既樣，到底警察係保護市民定係保護政府高官？
事緣早前有人於facebook上開了個group諗住叫人在上星期日（11月1日）齊齊到禮賓府度倒曾蔭權。老老實實，facebook唔係傳媒機構，咁少宣傳都預左唔會多人參加，最尾參與者估計有百多人到場，不過成功到達禮賓府既示威人數就只得十數個。原因，係因為示威集合時間開始前就有便衣和軍裝警察在禮賓府附近幾條街和動植物公園巡邏，找尋疑似示威人士，封截前往禮賓府的道路，事先阻礙示威人士到達禮賓府，所以才會造成報紙電視上示威人數只得小貓三四隻的假像，其實有更多人是被警察用種種方式擾攘、阻攔了。
以下片段係其中一種，用八個警察阻止你過馬路（但同時其他市民可繼續過），理由係「你太激動，我保護你既安全」，然後用廿幾個警察架鐵馬、圍人鍊阻止你繼續前進，情形就好像早前公安老屈香港記者藏毒，長時間扣押你以令你不能採訪。
片段中男的為浸會大學高級導師陳士齊，女的則是「女長毛」。請不要被女長毛的激動等等而轉移了重點，潑婦罵街不等於女長毛理虧，笑口噬噬不等於警察依法辦事。不多說了，想看的便看吧…
個政府無能怕事到咁，我真係睇到火滾…
Friday, 06 November 2009
-
駛唔駛借錢？ 加映無花果
基本上所有香港人每個星期都會收到最少一個問你需唔需要借錢周轉既電話，其實此類電話就有如在貧民區賣豪宅一樣滑稽，急需周轉的話我會自動自覺去問匯豐恆生借，衣食無憂時決不會因一通電話就屎忽痕貪玩借個十萬八萬，又唔係唔駛還，仲要俾好貴既息！
不過既然這種電話長接長有，應該一萬個聽電話的人當中有一兩個唔知匯豐恆生有錢借，又有一兩個屎忽真係好痕掛…
面對「點拒絕都死唔肯收線者」，以下推介兩個娛人娛己的應對方法，有時間不妨幫日打千個電話的苦悶電話推銷員解解悶…
1) 哦，唔駛啦，我有幾百億身家。係喎，你駛唔駛借d錢周轉下呀？最多我收你既息口比你公司收的再低d啦！
（我試過答佢我有幾百億身家，然後對方繼續問我駛唔駛借d錢去供樓…我同佢講你覺得我幾百億身家仲駛唔駛供樓呢？你問下呀李首富係咪仲供緊佢d豪宅…）
2) 喂要喎，我而家同人買緊旗但係身上無散銀，可唔可以同你公司借個一兩蚊呀，急需！（又或我想食麥當勞但無乜錢，可不可借三十蚊黎？）
記住電話推銷員都係打份工，千萬不可破口大罵，用以上方法幽人一默，最後加句「唔好意思我講笑架姐，真係唔駛借錢啦唔該哂。」（繼續死纏爛打者另計）
------------------------------------------------------
同場加映：無花果
唔知大家有無食過無花果，我就未。
老豆今日買了個價值二十大元的日本無花果，大小相等於一個檸檬，果肉稔味道甜但吃的時候感覺怪怪，除薄薄的表皮外，紅和白的果肉都可吃，不過仍然三兩下就食左廿蚊落肚。
結論：一試無妨，但唔值呢個價，或者國產既會平d既，不過實無咁稔無咁甜，食得無咁安心囉。
我諗無乜人見過無花果，所以我特登係毀滅佢前影左幾幅相，相信大家睇完後會更加無興趣食，因為佢既賣相算係醜既一群，而果肉中心更像極了…
……而果肉中心更像極了……科幻片中外星或史前怪物個口，好多唔知觸鬚定吸管定牙，而且佈滿黏液…arrrrrggggggg...
小心佢食左你！:P
Monday, 02 November 2009
-
遇到了
終於 你我 相遇到了 距離竟是如此近
只差一點點 可惜偏偏 到了最後一段
Wednesday, 28 October 2009
-
Kowloon Peak
這就是飛鵝山頂遠眺西貢，清風沿山吹上，爽得我後來還覺得有點冷…
其實身後另一邊亦能俯瞰九龍一帶，不過處處都是88樓高的豪宅，又怎及得上西貢一帶（比較）自然的風景？
無論如何，我還是喜歡大自然的生活和活動多一點。
Wednesday, 21 October 2009
-
彷彿不存在
我本不應……
但我偏想……
卻又不敢…… 就這樣吧。
Sunday, 18 October 2009
-
Balloon 1:0 Liverpool
雖然車仔輸波暫時讓左榜首位置予曼聯係令人傷心，但今日令利記輸波既呢個入波足以讓抑鬱症病人都笑返…
個紅色氣球係利物浦fans打入場…well無間道掛…
Monday, 05 October 2009
-
錯手…
早陣子自發現yahoo mail有「自動轉寄新email」功能後，我終於能無後顧之憂地從yahoo mail轉到gmail。為貫徹搬家的理念，我更手動將百多封舊email逐一從yahoo寄到google，就和小學時老師叫我們寫信給自己一樣。收到email後又再花時間將它們分門別類到各自所屬的file當中。所有工序都辦妥後就清除了yahoo mail內所有email，繼續全心全意開心地gmail去……
直到剛才。我不知按錯了哪一個掣，當我再進入gmail時竟發現 全 部 舊 email 都 不 見 了 ！
我有個不知是好是壞的習慣，可能是處女座人士的潔癖延伸到電子世界，就是要經常保持一個空的垃圾箱。就算gmail提供了大量儲存空間而我只用了不足1%，我仍經常清空垃圾箱…結果，今次我捉蟲了，我所有舊email都在世界上永遠消失了！！
那些舊email裡包括了：籃球教練的比賽報告、朋友間的通信、父母寄給我的email、各大網站/forum註冊的username and password（以防忘記）、小學老師鄭sir的舊email等等等等…我全部回憶都失去了。
這應該跟手提電話跌壞了，再也開不到機一樣，千個百個和朋友和舊情人的sms都消失掉，無奈又無助。它們全都是我的歷史和回憶，而歷史和回憶卻是世界上最虛無飄渺最脆弱的東西。縱使我知道我甚少打開這些email和sms，但是它們存在於mail box和sms inbox裡，卻起碼讓我實實在在的捉緊過去。
真是很珍貴的文字紀錄。
Saturday, 03 October 2009
-
忍不住 :P
我諗ada都叫唔落佢做青蛙王子，太唔匹配啦~~唯有叫住青蛙先生（青蛙青年都不能…）
然後為大眾著想，用青蛙公仔遮一遮…哈哈
對唔住呀ada，我真係忍唔到…嘿嘿 :)
Friday, 02 October 2009
-
中國最強！……抄
眾所周知，中國無野叻，最叻就係抄同假（其實仲有貪既，不過今次唔關貪事）
以下動畫截圖，左邊為cctv（官台）原創的道德教育片動畫《心靈之窗》，而右邊則是畫功一流故事感人既日本動畫《秒速五厘米》（anthony一定知啦）。
不用多說，睇圖後便明白。尾二那圖，基本上男主角是孿生的，無論髮形面形恤衫都係一樣…
其實cctv唔係第一次抄日本動畫的。數月前才被揭發cctv的《大嘴巴嘟嘟》抄襲《蠟筆小新》，當時內地還引起激烈討論到底這是不是抄襲…我心諗「唔係似到咁X樣都仲要討論/懷疑係唔係抄呀嘛？！擺明係啦下嘛？！」抄人野仲要抄到100%十足十，人物企位表情都一樣，真好野，最強係你！
以下貼數張圖，想看多點，可到>>>這個blog看更多<<<。《蠟筆小新》fans點睇，我地需唔需要討論一下到底佢有無抄到呢？ :)
駛唔駛連窗上那圓形唔知係貼紙定太陽既物體都抄埋呀？
後加：新聞報導前一分鐘倒數，CCTV Vs BBC。點解連新聞台都要抄？不過算啦，期望d乜呀…
Thursday, 01 October 2009
-
十月一日
若然你問我十月一日有什麼值得慶祝，除了今天是公眾假期外，我實在想不出另一個原因。
中國共產黨在二十年前，即1989年6月4日已經在天安門廣場表演了一次閱兵啦，軍人和坦克車長驅直進，遇人殺人，好不勇猛，簡直比今天全港電視台聯播的畫面更有氣勢！
國慶國慶，見到呢個國家個政府我就慶。
為何要慶祝一個獨裁的政權已經統治了好幾十年而歌舞昇平一番？我想不通…
有沒有人見過英美法德等國家的國慶日是封城、斷網，數十萬名士兵坦克飛機大炮火箭齊操入城以顯軍力國力？我沒有。但我見過另一個國家這樣做，那是北韓。中國大概跟北韓差不多吧！
